როგორ ერგებიან ბრენდები ახალ საკომუნიკაციო რეალობას

როგორ ერგებიან ბრენდები ახალ საკომუნიკაციო რეალობას

COVID-19-მა  მსოფლიო დღისწესრიგი შეცვალა და ჩვენ ყველა თანდათან ვიაზრებთ  კორპორატიული სოციალური პასუხისმგებლობის მნიშვნელობასა და კომუნიკაციის ძალას.

ბრენდებმა შეცვალეს  მიდგომები და კომუნიკაციის სტილი, დაიწყეს ბიზნესმოდელების ცვლილება და მათი სრულიად ციფრულ პლატფორმაზე მორგება. მაგრამ, თავდაპირველად ბევრმა მათგანმა ვერ გაიაზრა, რომ ბრენდი ცოცხალი ორგანიზმია, რომელიც მუდმივად  საჭიროა მომხარებლის ირგვლივ ვითარდებოდეს  და რეაგირებდეს  ახალ გამოწვევებზე, რის გამოც საწყის ეტაპზე მათი საკომუნიკაციო თუ ბიზნეს გადაწყვეტილება „მოდი, დაველოდოთ რა იქნება“  მიდგომას დაეყრდნო. თუმცა, მალევე მიხვდნენ შეცდომას და  დაიწყეს ფიქრი და ზრუნვა მომხმარებლებზე, მათი ყოფის შემსუბუქებასა და ცხოვრების გამარტივებაზე, იქნებოდა ეს მათი სერვისის თუ სახელმწიფოსთვის გაწეული ფინანსური დახმარების ხარჯზე.

ტოტალური მსგავსების ეპოქაში, ბრენდებს ერთამნეთისაგან სწორედ მათი  მთავარი, მამოძრავებელი იდეები გამოარჩევს, იდეა, რომელიც ბევრად მეტია ვიდრე  მხოლოდ მისიისა თუ პოზიიცონირების განაცხადი, ეს არის ის ძირითადი რამ, რაც ბრედნებს ეხმარებათ მომხმარებლებთან ემოციური კავშირის დამყარებაში და ბაზარზე პასუხიმგებლიან მოთამაშედ ჩამოყალიბებაში, ამისათვის კი საჭიროა პირველ ეტაპზე  3 კითხვაზე ჰქონდეთ პასუხი:

  1. რაციონალური: რას აკეთებენ?
  2. ემოციური: რატომ აკეთებენ?
  3. რატომაა ის მნიშვნელოვანი: რა გავლენას ახდენენ სამყაროზე?

პანდემიის პირისპირ, ბრენდები ახალი გამოწვევის წინაშე დადგნენ და მოუწიათ ზემოთ ხსენებულ სამ კითხვაზე პასუხების გადახედვა. დაფიქრდნენ, თუ რა რეაგირება უნდა მოეხდინათ ახალ რეალობაზე, რა ტიპის კომუნიკაცია უნდა წარემართათ მომხმარებელთან, როგორი უნდა ყოფილიყო მათი როლი პანდემიის შეჩერების პროცესში და რა სოციალური აქტივობები განეხორციელებინათ.

შესაბამისად, გამოიკვეთა სამი მიმართულება, თუ როგორ უპასუხეს ბრენდებმა ამ გამოწვევას.

  1. საწარმოო რესურსის გამოყენება

ბრენდების მთავარი მამოძრავებელი შეკითხვა ამ შემთხვევაში იყო ის, თუ რისი გაკეთება  შეეძლოთ პანდემიის შეჩერებისა და გავრცელების შენელების პროცესისათვის. მაგალითისათვის, ევროპასა და ჩრდილოეთ ამერიკაში ალკოჰოლური სასმელების მწარმოებელმა კომპანიებმა საწარმოო რესურსი სანიტაიზერების დამზადებაზე მიმართეს. ჩინეთში კი ბრენდებმა ქარხნებში პირბადეების და სასუნთქი აპარატების წარმოება დაიწყეს.

  1. საკომუნიკაციო რესურსების გამოყენება

ბრნდებმა, რომლებსაც არ გააჩნდათ საწარმოო რესურსი საჭირო სამედიცინო ინვენტარის საწარმოებლად, მათ ხელთ არსებული საკომუნიკაციო პლატფორმები გამოიყენეს პანდემიის შეჩერების პროცესში მონაწილეობის მისაღებად. მაგალითად, კოკა-კოლამ ტაიმ სკვერზე განათავსა საკომუნიკაციო გზავნილი, სადაც სოციალური დისტანციის დაცვისკენ მოუწოდა მომხმარებელს, ბილბორდზე კოკა-კოლას ასოები დაშორებულია ერთმანეთისგან და ახლავს წარწერა “ცალ-ცალკე ყოფნა ერთად ყოფნის საუკეთესო გზაა”.

  1. საზოგადოებისა და კომპანიების გაერთიანება საერთო მისიის მისაღწევად

ბრენდები დღეს იმაზე დიდ გავლენას ახდენენ საზოგადოებაზე, ვიდრე პანდემიის დადგომამდე. ისე მოხდა, რომ კორონავირუსმა საზოგადოება, კომპანიები ერთი საერთო აზრის „ჩვენ ყველას გვეხება ეს კრიზისი და უნდა დავუჭიროთ მხარი ერთმანეთს“ გარშემო გააერთიანა. ამ პერიოდში ადამიანების უმეტესობის საფიქრალი ვირუსისგან თავის დაცვა და ოჯახის გამოკვებაზე ზრუნვა გახდა. და სწორედ ამ დროს სოციალურ ქსელში გაჩნდა დახურული ჯგუფები, სადაც მოხუცების, უმუშევრად დარჩენილი ადამიანების დასახმარებლად არა მხოლოდ კომპანიები, არამედ ჩვეულებრივი მოქალაქეებიც კი გაერთიანდნენ.

ზოგიერთმა კომპანიამ დაიწყო საზოგადოებისთვის სხვადასხვა უფასო კონტენტის შეთავაზება, როგორიცაა, მაგალითად, უფასო ონლაინ კურსები, უფასო წიგნები. ზოგიერთმა ბრენდმა ვიდეო კონტენტის განთავსება დაიწყო, რომლის მეშვეობითაც იმ აქტივობებზე გვესაუბრება, რომელიც უფრო საინტერესო გახდის სახლში ყოფნას.

ასეთ რთულ პერიოდში თითოეულ ბრენდს შეუძლია გააკეთოს რაიმე იმისთვის, რომ თავისი წვლილი შეიტანოს საერთო მისიის შესრულებაში. ამას კი არც დიდი მასშტაბები სჭირდება, არც დიდი ბიუჯეტი. ეხლა განხორციელებული აქტივობები ის „საძირკველი“ იქნება, რაც ბრენდების მომავალს დიდწილად განსაზღვრავს.