მსოფლიო ჩემპიონატის ფინალამდე სულ რამდენიმე დღე რჩება. მთელი ტურნირის განმავლობაში ყურადღებით ვადევნებდით თვალს მოედანზე განვითარებულ მოვლენებს, ვარჩევდით საუკეთესო მატჩებს, გოლებსა და ემოციებს.

თუმცა, მარკეტინგისა და კომუნიკაციების სფეროსთვის მსოფლიო ჩემპიონატი კიდევ ერთი მნიშვნელოვანი ასპარეზია, ადგილი, სადაც ბრენდები ერთმანეთთან იდეებით, კრეატიულობითა და მომხმარებლის ყურადღებისთვის კონკურენციით ეჯიბრებიან. წლევანდელი მუნდიალიც ამ მხრივ არაერთი საინტერესო კამპანიით დაგვამახსოვრდა. სწორედ ორ გამორჩეულ ქეისს გადავხედოთ.

Aguila Beer – როდესაც მომხმარებელი თავად წყვეტს რეკლამის ფასს

პირველი ქეისი კოლუმბიური ლუდის ბრენდის Aguila Beer-ის კამპანიაა, რომელმაც ერთი შეხედვით საკმაოდ მარტივი პრობლემისგან კრეატიული მარკეტინგული იდეა შექმნა.

თუმცა მანამდე ერთი მცირე კონტექსტი. ბოლო ათწლეულში ეროვნული ნაკრებების ორიგინალი მაისურების ღირებულება მნიშვნელოვნად გაიზარდა. არ აქვს მნიშვნელობა, ტექნიკური სპონსორი ადიდასია თუ ნაიკი ოფიციალური ეკიპირების შეძენა ბევრ გულშემატკივარს საკმაოდ ძვირი უჯდება. გამონაკლისი არც კოლუმბია იყო, სადაც ეროვნული ნაკრების ოფიციალური მაისურის ფასი დაახლოებით 150 დოლარს აღწევდა, რის გამოც გაყიდვებიც მოლოდინზე დაბალი აღმოჩნდა, ხოლო გულშემატკივრები მაისურის გარეშე დარჩნენ.

სწორედ ეს ტენდენცია შენიშნა Aguila Beer-მა და შექმნა კამპანია Resize the Price. ბრენდმა ოფიციალური კოლუმბიის ნაკრების მაისურები შეიძინა და მათი გაყიდვა თავად დაიწყო, თუმცა ერთი განსხვავებული პირობით თითოეულ მაისურზე Aguila ს ლოგო იყო დატანილი, მისი ზომა კი მთლიანად მომხმარებლის არჩევანზე იყო დამოკიდებული. რაც უფრო დიდ ლოგოს აირჩევდა გულშემატკივარი, მით უფრო ნაკლებ თანხას გადაიხდიდა მაისურში.

შედეგად, მომხმარებელი თავად წყვეტდა, რამდენად დიდი ადგილი დაეთმო ბრენდისთვის საკუთარ მაისურზე. ლოგოს ზომის არჩევა შესაძლებელი იყო როგორც Aguila-ს ვებგვერდზე, ასევე სპეციალური აპლიკაციის მეშვეობით შეკვეთის პროცესში.

ერთი მხრივ, გულშემატკივრებმა ოფიციალური მაისურების შეძენა უფრო ხელმისაწვდომ ფასად შეძლეს, მეორე მხრივ კი Aguila-მ ათასობით ადამიანი საკუთარ მოძრავ სარეკლამო სივრცედ აქცია. კამპანიის ყველაზე საინტერესო ნაწილი სწორედ ის იყო, რომ რეკლამის მასშტაბს თავად მომხმარებელი განსაზღვრავდა. ხშირად ყველაზე ეფექტური მარკეტინგული იდეებიც სწორედ მაშინ იბადება, როდესაც ბრენდი რეალურ პრობლემას მარტივი, სახალისო და მომხმარებლისთვის სასარგებლო გზით პასუხობს.

Levi’s – როდესაც ლოგოს დასანახად მისი გამოჩენაც აღარ არის საჭირო

არანაკლებ საინტერესო იყო კიდევ ერთი ქეისი, რომელიც უშუალოდ მსოფლიო ჩემპიონატის მასპინძელ ქვეყანაში განვითარდა და FIFA-სა და Levi’s-ს შორის არსებულ, ერთი შეხედვით, ჩიხურ სიტუაციას უკავშირდებოდა.

როგორც ცნობილია, მსოფლიო ჩემპიონატის მატჩების დროს სტადიონებზე მხოლოდ FIFA-ს ოფიციალური სპონსორების ბრენდირებაა დაშვებული. სწორედ ამიტომ სან-ფრანცისკოში საინტერესო პრობლემა შეიქმნა მატჩები Levi’s Stadium-ზე ტარდებოდა, თუმცა Levi’s ტურნირის ოფიციალური სპონსორი არ იყო.

ყველაზე დიდი გამოწვევა სტადიონზე არსებული უზარმაზარი Levi’s-ის აბრა აღმოჩნდა, რომლის დემონტაჟიც პრაქტიკულად შეუძლებელი იყო.

გამოსავალი მარტივი, მაგრამ ძალიან კრეატიული აღმოჩნდა. ბრენდის ლოგო მთლიანად თეთრი საფარით დაიფარა, რის შედეგადაც ფერები და წარწერა აღარ იკითხებოდა, თუმცა ლოგოს ფორმა მაინც მარტივად ამოსაცნობი დარჩა. სწორედ ეს იდეა აქცია Levi’s-მა საკუთარ საკომუნიკაციო კამპანიად ყველა ციფრულ პლატფორმაზე დროებით შეცვალა ლოგო და მომხმარებელს მხოლოდ მისი თეთრი სილუეტი აჩვენა.

შედეგად, Levi’s-მა მსოფლიო ჩემპიონატის ერთ-ერთი ყველაზე განხილვადი მარკეტინგული მომენტი შექმნა ისე, რომ ტურნირის ოფიციალურ სპონსორთა სიაში არც კი იყო. ზოგჯერ ყველაზე ძლიერი კომუნიკაცია არა მაშინ იქმნება, როცა ბრენდი ყველგან ჩანს, არამედ მაშინ, როცა აუდიტორია მას მინიმალური მინიშნებითაც კი ცნობს.

მსოფლიო ჩემპიონატი კიდევ ერთხელ გვახსენებს, რომ დიდი სპორტული ღონისძიებები მხოლოდ ფეხბურთის მოედნით არ შემოიფარგლება. პარალელურად მიმდინარეობს იდეების, კრეატიულობისა და ბრენდების კონკურენციაც, სადაც ხშირად ყველაზე დასამახსოვრებელი კამპანიები არა ყველაზე დიდი ბიუჯეტით, არამედ ყველაზე სწორად დანახული მომხმარებლის პრობლემით იქმნება.